احنا مش لماليم وهما مش بوابين

«ياله يا لماليم أنتم ليكم عين تلعبوا و تشجعوا تانى بعد ما راح منكم الدورى السنة اللى فاتت» ، «أيوه يا بواب أنت بواب ياله" ، «أنت بواب أخرك تشتغلت تحت عمارة» ، «أنا مش هرد على واحد لملوم ذيك ..ولا انا هبر واحد من البوابين أمثالك».

أه والله هو ده اللى بيحصل من غير تأليف ولا ابتكار و لا أى حاجة  المشهد ده واقعى وعبارات أطلقها جمهور فريقى الأهلى والزمالك وبتتكرر كل دقيقة وكل ثانية بدون مبالغة سواء فى البيوت بين الأقارب أو القهاوى بين الأصحاب .

القصة بطلها واحد لملوم وده من جماهير الأهلى وواحد بواب من جماهير الزمالك  للأسف ممكن اللملوم ده يبقى دكتور أو مهندس والبواب ممكن يكون طبيب أو صيدلى .

أيام زمان حوار زى ده كان ممكن يدور بين الناس البسيطة فى حياتها، أيام الأمية والجهل وعلى الرغم من ده وده كان الإحترام متواصل، لكن دلوقتى ماشاء الله كله بيشتم وبيهزأ علشان مباراة فريقين .

طبعا بعد تفكير عميق، فكرت أشوف معنى الكلمتين، طبعا كلمة بوابين دى مش محتاجة وهى عبارة عن مهنة شريفة مثلها مثل باقى المهن لا تقل إحتراماً أو تقديراً لصاحبها هى مهنة بيقوم بيها رجل محترم بالإضافة إلى سهره لحراسة شركة أو عمارة، بصراحة دى ليست شتيمة أو إهانة بل بالعكس دى مهنة تستحق الشكر والتقدير .

أما كلمة لماليم، فدى كلمة غريبة شوية  قولت أدخل على جوجل اشوف إيه معناها فى القاموس أو المعجم العربى وجدت إن من أبرز معانيها جيش كبير محتشد أو الجَيْشُ الكثير المجتمع، وبرضه ليس بها أى إهانة لجمهور النادى الأهلى لكن السائد فى الوقت الحالى أن كلمة لماليم هم مجموعة من الناس ليس لهم أصل وعلى ما أظن أن جمهور الأهلى مصريين شرفاء مثلهم مثل جمهور الزمالك لا هما من التتار أو المغول لكن أصل الكلمة توضح تعظيم لجمهور الأهلى ووصفهم بالجيش .

وكلمة لماليم  استخدمت مع ظهور الفكر الاشتراكي لتعبر عن كل ما هو منضم لفكر ما بدون أى وعى أو عدم اقتناع، يعنى كل المستفيد من الكلمتين اننا  بنهين مهنة البوابين و بنحرف فى كلمة مش بتنطبق على المشجعين "لماليم "، احنا بنهين بعض وبنتخانق وبنزعل لكن الفرق واضح جدا فى الملعب رمضان صبحى بيحب شيكابالا عادى ولو شافوا بعض بياخدوا بعض بأحضان الملاعب والروح الرياضية لأنهم أصدقاء وزمايل والمكسب بالنسبة لهم فرحة رياضية والخسارة تجديد لمستواهم ولا ها أعداء ولا بنهم ورث بيتخانقوا عليه .

كتير مننا بيسأل إمتى الجمهور هيرجع المدرجات، طيب بالزمة إذا كان واحنا على القهوة  بنشتم بعض و بنهزأ بعض لما نتجمع و نكون أعداد كبيرة هيحصل إيه؟! اكيد هيحصل مجزرة تانية وتالتة ورابعة طول ما مبنفكرش و لا بنحترم بعض أكيد ده هيحصل.

أتمنى يكون فى بنا روح المرح وبإحترام مش بقولك مش تغيظ  صحبك بس بلاش إهانة، ياريت نبتدى صفحة جديدة ونضحك ونهزر وننتقد لكن بدون تجريح وبدون تعصب بيوصلنا لمجازر نهايتها شهداء معظمهم شباب زى الورد محتاجينه يبنى بلده .