هل يجوز الزواج من زملكاوية؟

هى المشكلة إنها زملكاوية، أقسم بالله ما عارف هتعامل معاها إزاى، طيب أنت عارف أنا استحمل تكون يهودية و مستحملش أعيش مع زملكاوية مش قااادر أنطقها  و لا ابوها كمان زملكاوى، أنا أتصدمت ...طيب دى أعيش معها إزاى؟  أتكلم معاها إزاى؟ ولادى لما يكبروا  مش ممكن حد فيهم يطلع زيها، أنا دماغى هتتفرتك .

الكلام ده مش من فيلم كوميدى، ولا مسرحية ولا قصة مصطنعة، الكلام ده بقى واقع بنعيش فيه دلوقتى، كنا أيام زمان، لما بتسأل الولد إيه مواصفات فتاة أحلامك يقولك جميلة وبنت ناس محترمة و مثقفة ، دلوقتى الوضع أختلف خالص بقى أهم حاجة عنده أنها تكون أهلاوية ولا زملكاوية .

وفى بنات بتخبى إنتمائها لحد بعد الجواز وده حصل فعلا تلاقى الزوج أهلاوى والزوجة زملكاوية أو العكس  بس بيكون الطبيعى أن بعد كل مباراة بين النادى الأهلى والزمالك  لأما  بتروح هى عند أمها أو بياخد هو نفسه يسافر مع صحابه و ده بسبب أنها فرحت لما الجون دخل .

للأسف هو ده تفكير كتير منا من المتعصبين لفريق معين سواء الأهلى أو الزمالك روح التعصب وصلت لشريكة حياتك، أم عيالك، يتوقف أختيارك ليها على إنها أهلاوية ولا زملكاوية .

من أيام قليلة جدا أتوفى الكابتن حمادة أمام لاعب نادى الزمالك و منتخب مصر الأسبق، الغريب أن من أكبر صور البطولة اللى هزت الصحافة المحلية لما الكابتن طارق سليم رمز من رموز النادى الأهلى راح يقدم واجب العزاء، الناس شافت أن ده  بطولة وروح فرسان ، شافوا أن رمز النادى الأهلى يروح يعزى فى رمز نادى الزمالك ومحدش أهتم أن الكابتن طارق سليم  جالس على كرسى بعجل  وأن مرضه  ممنعوش من تأدية الواجب لا لا كمان هما أهتموا أنه أهلاوى وراح يقدم واجب العزاء فى زملكاوى .

مثال تانى للمقاطعة اللى عملها جمهور نادى الزمالك بعد تغيير شريحة كبيرة منهم لشبكة فودافون بعد ما أصبحت تانى الراعى الرسمى للنادى الأهلى، ويا سلام بقى جمهور نادى الأهلى بطل يكل جبنة علشان الراعى الرسمى لنادى الزمالك؟ محدش فكر فى الناس اللى بتشتغل فى الشركات دى؟ محدش فكر لو المقاطعات دى نجحت هيكون نتيجتها إيه على أسر العائلات اللى بتشتغل فيها ؟ 

كل ده بيحصل من الجمهور اللى نسيوا نفسهم بدل ما بيقضوا وقت ممتع و يتفرجوا على المباراة  لمدة 90 دقيقة وتخلص، خلوا حياتهم كلها مباراة ومنافسة ومحدش بيفكر فيهم  غير مين هيلاعب مين و مين معاه كام نقطة ومين هياخد الدورى ومين هياخد الكاس .

فى الوقت اللى بتتعصب عشان لاعبين الأهلى والزمالك بيكون  اللاعبين  قاعدين مع بعض بيضحكوا وبيهزروا لانهم عارفين يعنى إيه رياضة ويعنى أية روح رياضية  ولاعيبة كتير بتلعب فى الاهلى وهما مشجعين للزمالك و لعيبة بتلعب فى الزمالك وهما مشجعين للأهلى.

نصيحة ياريت بدل ما تتخانق مع زميل ليك عشان مباراة ممكن تاخد نفس الشخص وتلعب معاه وجسمك يستفيد وصحتك تكون أفضل بدل الفرجة على المباريات اللى سببت خلافات كتير، وبرضه ميمنعش تشجع ناديك وتحبه لكن متكرهش أخوك ولا صاحبك عشان مبيشجعش نفس الفريق اللى انت بتحبه، شجع فريقك لكن متخسرش أم عيالك عشان بتشجع مين، الرياضة ممارسة مش مشاهدة مش معنى إنك بتتفرج على كل المباريات إنك رياضى وإنك بيبو ولا حازم إمام، ونمى نفسك وألعب وفيد نفسك بدل ما بتحرق سجاير وأعصابك وأستمتع باللعب، الرياضة صخرة تتحطم عليها سفينة الشهوات، أتمنى تمارسها وتحطم عليها روح العدوانية اللى أصبحت شهوة فى هذه الأيام .