رمضان «أسامة أنور عكاشة»

تحدثت الإعلامية إسعاد يونس، على «الراديو 9090»، عن الكاتب الراحل أسامة أنور عكاشة.

وقالت إسعاد يونس: هو رمضان كان ينفع يبقى رمضان من غير شغل عم أسامة أنور عكاشة.. بالك انت.. رمضان الثمانينات والتسعينات ينفع تقول ده رمضان الشهد والدموع وده رمضان الجزء التانى من ليالى الحلمية.. عادى اننا نعلم سنين عمرنا بمسلسلات أسامة أنور عكاشة.. ومسيرة أسامة بصراحة تستحق اننا نقف قدامها شوية.. شويتين..

هو خريج كلية الآداب قسم الخدمة الاجتماعية.. وبعد التخرج اشتغل موظف.. شوية فى الشؤون الاجتماعية فى كفر الشيخ وشوية مدرس فى أسيوط، وشوية فى رعاية الشباب قى جامعة الأزهر..

الترحال ده بين محافظات مصر وشغله كأخصائى اجتماعى خلاه يرصد التفاصيل الصغيرة اللى استخدمها بعد كده فى أعماله الدرامية..

أسامة أنور عكاشة كتب مجموعة قصيرة بدأ نشرها سنة 67، ولما دخل مجال الكتابة الدرامية تحس انه قفش فيه وتبّت، وكانت النتيجة عدد من أجمل الأعمال الدرامية التى ارتبطت بذكرياتنا عن رمضان، ولأن الدراما سرقت الموظف من وظيفته قرر ان الوظيفة خلاص واستقال من وظيفته بالجامعة وركز فى شغله.

كانت البداية مع سهرة عنوانها "الإنسان والجبل" سنة 69، أيام ما كان التليفزيون بيقدم سهرات مفيدة للجمهور ومفيدة فى اكتشاف كتاب دراما جدد.. ده كان زمان طبعا الله يعيدها أيام، بعدها قدم أسامة كذا مسلسل ما كانوش ناجحين أوى يعنى، وبرضه ما كانوش فاشلين أوى، حاجات زى "سلمى"، "الفجر الأخير"، "الحصار"، لحد ما قدم مسلسل "وقال البحر"، المسلسل اللى كان بداية معرفة الجمهور باسم أسامة أنور عكاشة وبقت الناس تتابع أعماله بالاسم..

بالك انت بقى كان المسلسل بطولة مين.. محمود المليجى، عزت العلايلي، صلاح السعدنى، فردوس عبد الحميد، حمدى أحمد، وعمل اسم شهرة لأسامة أنور عكاشة خليته متربع على عرش الدراما ليوم رحيله، شهرة كبيرة لدرجة ان سيناريوهاته كانت بتطبع وتتباع ككتب، وطلبة الدراما النهاردة بيذاكروا أسامة أنور عكاشة وبقى رمضان مكتوب باسمه، مرة الشهد والدموع ومرة أنا وانت وبابا فى المشمش ومرة واتنين وتلاتة ليالى الحلمية، وبقى رمضان من غير شغله ناقص حتة..

بصراحة أسامة كان صاحب رؤية ملهاش مثيل لعيوبنا كمجتمع، وايه الحاجة الكويسة اللى فينا ولازم نتمسك بها، أسامة كتب على قد ما كتب فوق الـ60 مسلسل وسهرة درامية، وكام فيلم.

أسامة صحيح سابنا لكن ذكرياتنا معاه مش ممكن تنتهى ولا أعماله ممكن تتنسى، لأن دى قيمة الفن وفكرته.