قواعد رأس السنة العشر

أقل من شهر وهتهل علينا السنة الجديدة 2016, وانا شخصياً احب اقولها خوشي برجلك اليمين ياشابة, وعايزة أوجه بعض النصايح والقواعد اللى من المفترض نتبعها في السنة الجديدة عشان ربنا يكرمنا ويصلح احوالنا كده

إليكم الآتي:

قاعدة رقم واحد:

إحياة ابوكوا يا شيخ منك ليه ليها ماتكتبوا 2016 " بليز بليز بي نايس ", " بي جود " ملحوظة انا كتبتهم بالعربي عشان هيلخبطوا الكلام لو اتكتبوا بالانجليزي بس انتوا فاهمني صح ؟!

فأرجوكم آسفه ونادمة أي حاجة فيها " بي " توسلات للسنة انها تبقى لطيفة ظريفة خفيفة بلاش , 2016 مش سمعاكوا ولا هتسمعلكوا و صدقوني الكلام ده خطر على صحتكوا وبيدمر صحتنا ويؤدي إلى الوفاة واحنا عايزينكوا.

قاعدة رقم اتنين :

لو فضلتوا مستنين الحياة من حواليكم تتغير عشان حياتكم تكون افضل وأسعد يبقى ده منتهى السذاجة, غيروا نفسكوا وطوروا منها ساعتها هتحسوا بتغيير من حواليكوا, أجروا ورا أحلامكم او على الأقل اتقنوا أعمالكم واشتغلوا بضمير وحُب.

قاعدة رقم تلاتة:

ارجوكم ماتدخلوش فى خصوصيات الناس ده لمصلحتكوا اولاً واخيراً تقولي ليه اقولك عشان " من راقب الناس مات هماَ" خودوها نصيحة من اختكوا الصغيرة هترتاحوا وتريحوا والله.

قاعدة رقم اربعة:

لو دمك مش خفيف او انسان غير لبق وغير مثقف أرجوك ماتتحفش الناس بفيديو بتعترض فيه على أى حاجة وبتقول فيه أي كلام عشان ده وباء وانتشر بغباء يعني آه والله " زيمبقولك كده".

قاعدة رقم خمسة :

اتفرجوا علي فيديوهات الفنانة فيفي عبده كتير على سبيل الترفيه والله دمها عسل عسل هتنبسطوا وتضحكوا " قشطات عسلات فُلات ".

قاعدة رقم ستة :

اتعلموا لُغات كتير مش بس انجليزي, لا فرنساوي على ايطالي على اسباني أى لغة بتحبوها او بلد حابين تروحوها حتى لو مش هتروحوها اتعلموا لغتها الموضوع مش صعب عايز إرادة وشغف بس.

قاعدة رقم سبعة:

ماتتكلمش فى موضوع انت مش عارف كل جوانبه, ماتفتحش مواضيع سياسية ودينية وتخون وتكفر في اللى حواليك عشان انت هتخسر كده نفسك قبل ماتخسر اللى حواليك.

قاعدة رقم تمانية:

احضروا حفلة لعمر خيرت واسمعوا مزيكا نضيفة وأما تحبوا تتفرجوا على مسرح روحوا شوفوه على الحقيقة مش على التلفزيون, اهتموا بصحتكم عشان ليها حق عليكوا فألعبوا رياضة كتير, وأرقصوا حتى لو في اوضتكوا لوحدكوا, طلعوا كل الطاقة السلبية اللي جواكم, اخرجوا واتفسحوا مع اللي بتحبوهم حتى لو خروجات بسيطة ومش مُتكلفة وقولولهم احنا بنحبكم وهنفضل معاكم, امسكوا ايديهم وطمنوهم وطمنوا بيها نفسكم ان الدنيا لسه فيها حاجات كتير حلوة.

قاعدة رقم تسعة:

اما تزعلوا من حد وتبقوا عايزين تفضفضوا يا تتكلموا مع ربنا يا تكتبوا على اللى عايزينه في ورقة كده أفضل وأرقى, كمان ماتوقفوش حياتكم على حد بس حطوا في اعتباركم ان كلنا كلنا بلا استثناءات مليانين عيوب وبلاوي بس ربك اللى سترنا, اتقبل نفسك زي ماهي واتقبل اللى قدامك زي ماهو, غيروا العيوب اللى سكتها شمال, غيروا العيوب اللى هي كوارث وغير متفقة مع البيئة والأخلاق والدين والطبيعة والأصول, غير كده لو عيوبكوا آدمية بشرة طبيعية ماتتغيروش عشان حد لو ضروري اوي يبقى اتغيروا لنفسكوا, انتوا حلوين بقرفكم قبل حلاوتكم.

قاعدة رقم عشرة:

حسنوا علاقتكوا بربنا أياً كانت ديانتكم ومعتقادتكم فأهتموا بيها ودايماً قربوا من ربنا ماتقطعوش الحبل اللى بينكم وبين اللى خالقكم عشان ربك هو الوحيد اللى قادر يحسسك بكل لحظة من اللى فاتوا من السعادة ويحس بيك وقت الضيق وهو بس اللى قادر يزيل عنك ويقويك ويعلي من شأنك ويطيب قلبك ويرزقك, قربوا من ربنا عشان يطلع الخير اللى جواكم ويكفيكم شر نفسكم.

في نهاية المطاف عايزة أنوه انه مش فرض عليك تنفذ العشر قواعد دول بحذافيرهم قد تتفق مع البعض وقد تختلف او ماتضيقش خُلقك وخليه استرتش كده معانا مش هما دول بس الحاجات الحلوة في الدنيا لأ اطلاقاً شوف اللى يناسبك أيه وطبقه وكمان أسرح بخيالك وحقق اللى بتتخيله ماتخليش حد يحركك او يتحكم فيك ولا في افكارك ولا في احلامك , اطلق العنان لتفكيرك عشان تبقى مُبدع وخَلوق ومتنساش تنزل تحتفل بكل سنة جديدة ميلادية او هجرية المهم انك تحتفل بطريقتك "وتنبَسط وتبل الشربات", إعمل حاجات جديدة ومفيدة ومُفرحة.