أرملة أحمد الجبلى نصابة بالأدلة

طبعا كلنا قرينا الأخبار المتداولة عن رضوى جلال النصابة, الموضوع اللى فجأة بقى حديث السوشيال ميديا كلها وتقريباً مفيش حد معلقش عليه سواء بالسلب أو الإيجاب، اللى مش عارف مين رضوى جلال وانا شخصياً مكنتش أعرفها بس اكتشفت انها أرملة احمد الجبلي الشاب اللى توفى من فترة ورضوى فضلت تشير فى صور ليهم و تتكلم عنه قد ايه هو كان متدين ومحترم وبيحبها وعن مدى الحب الشديد اللى كان بينهم وأن ربنا عوضها بأبنه.

 رضوى كانت حامل وربنا رزقها بولد وطبعا خدت شهرة كبيرة جدا بسبب تعاطف الناس مع موت زوجها اللى مكملش معاها سنة, أحب أسلط الضوء على نقطة أن رضوى تمتلك مشروع مليكة لملابس المحجبات والأزياء ده من قبل جوازها بـ أحمد الجبلي بفترة مش قليلة, في ناس كتير حبت رضوى وكانت متبعاها ومتابعة نجاحها وشايفين انها رمز للصمود والقوة انها قدرت تكمل حياتها بعد وفاة زوجها وطبعا قدرت تتحمل صدمة كبيرة جدا على واحدة فى بداية حياتها وفي عز شبابها, وجزء تاني كان معارض وبيهاجم ودول بينقسموا لنوعين نوع بيهاجم هجوم موضوعي بدون أى ألفاظ أو اتهامات جارحة وجزء تاني مفيش فى لسانه غير السب والشتايم, مش هو دي القضية, القضية انه فجأة وبدون أى مقدمات لاقيت نسبة مش قليلة عمالة تتكلم عنها , طب في أيه يا جماعة, عملت أيه رضوى دي, رضوى طلعت نصابة, نصبت على ناس كتير في مبالغ كبيرة جدا وسافرت بره مصر ومحدش عارف يوصلها ده بالظبط اللى بيتدواله الناس, الموضوع مأثرش انتباهي أوي بصراحة إلا لما صحيت ونمت لاقيت الفيس بوك كله بدون مبالغة بيتكلم عنها وزي ماكان في ناس مختلفة على تصرفاتها بعد وفاة زوجها, كان في ناس بردو معاها وضدها في قضية النصب دي, وفي البعض اللى بيهيص فى الهيصة وبيتكلم وخلاص اللى هو في حفلة النهارده على واحدة اسمها رضوى يلا بينا نحفل, السئ بجد واللى خلاني اتكلمت فى الموضوع الغير مهم بالمرة ده لأن في كمية كبيرة من النصابين على مستوى مصر كلها مش موضوع نعمل عليه كل الدوشة دي واساسا مش احنا اللى بره المشهد اللى هنحكم , الحكاية كلها على بعضها فى حلقات كتير ناقصة ومش مفهومة والنيابة بقى والقضاء اللى هيحكم فيها.

 الغريب أنا فوجئت بناس بتشتم فى زوجها احمد الجبلي الشخص اللى أغلب الناس اجمعت على اخلاقه وأدبه ونزاهته وسيرته من كلام قرايبه وصحابه عليه مش عليها أى غُبار منقدرش نُجزم ميه فى الميه بس بنسبة كبيرة الكلام صح واللى هو مات أساساً, اللى هو مش موجود حتى عشان يدافع عن نفسه, اللى هو مالوش أى علاقة بتصرفات ست هو مش معاها اساسا وفي مكان تاني لا هيقدر يقولها انتي بتعملي ايه ولا يوقفها, هو مش موجود فى الدنيا عشان تحكموا عليه ويقدر يرد غيبة نفسه, هو مات, ليه يتهان ويتشتم بأسوء الكلام, ايه المبرر, ايه يخليني افتح الكمبيوتر ولا الموبايل بتاعي عشان اكتب كلمتين فى حق واحد مش موجود في الحياة, المتهمة فى الموضوع حتى لسه ما أثبتوش انها مُدانة, فا احنا سيبنا رضوى والنصب وكل اللى حصل وقررنا نشتم ونغتاب بني آدم ميت, هو ذنبه أيه ان مراته نصبت على الناس دى إن كان الموضوع ده حقيقي أصلاً, عمر ما حد فينا مااتخدعش في إنسان حَبُه ؟ عمر مااتنين انفصلوا عشان طرف وحش لايطُاق لأي سبب من الأسباب, كلنا حياتنا حلوة ومنزهين عن الأخطاء, كلنا ملايكة مبنغلطش وقررنا نحاكم إنسان غير موجود, كلنا معندناش مشاكل ومقبلناش الطيب والشرير؟ اسأله كتيرة أوى وعلامات تعجُب واستفهام كتيرة اوي و كمية غضب جوايا مش قادرة اعبر بيها ولا حتى بالكتابة ولا بأي كلام, كل اللى حساه وبدأت اصدقه إن أحنا وصلنا في حياتنا لحيطة سد.