طريقة عمل القطايف بالمكسرات من مطبخ الشرقية الآن

المقادير:-

• 1/2 كيلو قطايف عصافيري "صغيرة"

• كوب بندق مجروش

• كوب لوز مجروش

• كوب سوداني مجروش

• 1/2 كوب سكر

• 1 معلقة كبيرة ماء زهر أو ماء ورد

• زيت للقلي

• شربات

الطريقة:-

1. هاتي طبق واخلطي فيه البندق واللوز والسكر، وضيفي ليهم ماء  الورد.

2. هاتي القطايف واحشيها معلقة كبيرة من خليط المكسرات اللي عندك، خدي بالك إن الحشو ده يكون في وسط قرص القطايف، واقفلي قرص القطايف بالضغط عليه بإديك، وخدي بالك إنك تتأكدي من عدم وجود أي حشو ظاهر.

3. بعد ما تخلصي حشو القطايف كلها هاتي طاسة وسخني فيها الزيت كويس، وبعد كده اقلي القطايف على درجة حرارة متوسطة، لغاية ما تلاقي إن لون القطايف بقى ذهبي شيليها من الزيت وحطيها في الشربات، وبعد كده طلعيها من الشربات وحطيها في مصفاة علشان تتخلصي من الشربات الزيادة، وبعد كده حطيها في طبق الحلويات.

ودي كمان طريقة عمل شربات القطايف..

مقادير الشربات:

• 1/2 كوب سكر

• 3/4 كوب مية

• عصير ليمونة

• فانيليا

طريقة عمل الشربات:

ضعي السكر والمياه في إناء على نار هادئة لمدة ربع ساعة، ثم ضيفي الليمون وأتركيه لمدة 5 دقائق حتي يغلي، وضيفي الفانيليا وبعدها ارفعيه من على النار واتركيه يبرد